mag's house

6月21日 西宁3 离开

    下午1点几的飞机，朝早争取时间去左趟北禅寺，系中心广场果边有几路车去，上车1蚊，几个站就到。可惜一路落雨，而且悬空的部分只是开放左好少的一段。3点到西安，夜晚约左畅工食饭，准确黎讲应该是我地去厄饮厄食，多谢畅工支持~~~ 条回民街真是令人惊恐，日头净是得路两边摆摊，夜市果时就变左三列摆摊，各式各样的小食，估计10日都试唔完。

广场同风筝

6月20日 西宁2 奇怪的穆斯林

    朝早起身之后继续聆听真主的召唤，快到中午的时分出去，今日向东行，去中国邮政寄postcard，有个回族姨姨罗住张寄件单过黎叫我帮距填地址，我话应该写距地自己的语言都得，距话距唔识写任何文字，实在是有D神奇，难道距地唔使睇住可兰经黎诵读？邮局对面就是东大街清真寺——西北四大清真寺之一，建筑这里先不说，发觉进出的都是男穆斯林，清真寺入面设有学堂，难道距地有性别歧视，女的唔使接受教育或唔使去祈祷？我系清真寺的礼品店入面小转一下，见到D经书，随手摸左下其中一本的封面，掌管的伯伯即刻走过黎，落左支貌似清凉油的香水，系全部经书的面头都洒一遍甘露~~ 就好似我是发疯的一样，设想我要买本经书，个伯伯会唔会轰我出去？之后去左马步芳公馆，民国时期的豪宅，市值2亿几，如果我有两亿几我都会买左距，占地大，而且好多玉啊~~~

6月19日 西宁1

     好早就醒左，煲左D红糖茶，甘休闲的旅游唔多适合我，所以我会选择处于不断的行走同转换的旅游方式，直到思想、心境都调整过黎，再稳个地方训觉、发呆。寻晚入住西凉驿，一个改建旧民居的青旅，主人话水泵坏左，无热水冲凉，今日真是忍受唔到自己果扎藏民甘的头发，发现厕所个洗手盆有冷热水，就甘堆个头埋去，我到宜家都解释唔到甘窄的空间点可以洗头。反正出街的时候是一头清爽，伊边的铺头好晏先开，8点几9点，莫家街的市场先开始陆陆续续摆挡。今日一直向西行，经过大十字，伊边整紧地下商业街，成条主干道封晒，之后到中心广场，确实新城市是有D优势，D市政景观做得相当唔错，最后行到去新宁广场，参观省博物馆。参观完之后都已经是下午，去书店买左本可兰经，系莫家街食羊杂碎，见到个卖杂碎的姨姨系果一大锅汤底入面捞左个羊头出黎比客人，个客食羊头脑髓食得津津有味，羊杂碎实际上是羊头汤+白水煮羊杂，据说是早餐食，难怪之前系茶卡夜晚去食羊杂碎个店主话已经卖晒，食的时候伴馍，就好似浓汤配法国面包甘。仲据说客人可以要求食羊头脑髓，完全免费。将只羊食到甘精致，估计无人能及。下午睇穆罕默德的故事。

周街都是伊D花,唔知叫咩名

6月18日 仲系青海湖

    早上照样天晴，就好似寻晚咩都无发生过甘，去湖边梳洗，发觉青海湖D湖水是随天色而变化颜色。拜别左师兄们，我地8点几上路。行到20km处有个村庄，是个咩太阳能试验基地，当地的藏民见到我地，都好友好甘打招呼，因为距地D汉语不太灵光，好多时候都是微笑同手语搭够。有个藏民伯伯问我地是唔是转海子，就指指青海湖画个圈，我都画圈示意翻，距好似好开心甘。另外有D车行过，见到我地徒步，竖起大拇指。可能要令距地失望，其实我地无打算徒步太耐。行到32km处，我地截左一班湟中发天峻的班车（每天一班，12点几经过环湖西路），15蚊载我地到315国道，途中经过鸟岛，不过鸟岛太商业化，so我地从来无考虑系鸟岛停留。系315国道的三岔路口，有间士多，士多的人话比我地知可以等2点钟天峻发西宁的过路班车，45元/人，我地三个放低个backpack横坐系三岔路口度，1点几，有趟西宁发鸟岛的班车经过，我地话要去西宁，个司机叫我地先跟距入鸟岛，等距地三点几系鸟岛发回头车，只收40元/人。真是稳食艰难，我地唔知点就上左距车，兜兜转转又入左鸟岛。点知部车唔多争气，到刚察就要整车，9点几翻到西宁，出乎我地意料，西宁好现代化，好都高层，不过D立面做得有D弱。